Acts 18
Paulo Mulai Muxolu ne Kolinito
1Ili'i la Paulo mulutu ne Atenai, la sou anu mu'ume muvaxa ne Kolinito, sou mulai muxolu a lai ne. 2 aNo mine anu muxolu lai ne, la muxalisou itema vile sie Iutaia ne ualasou lexe Akuila ne nenu mivo'onu no xalee lia tila ne Pontasi ilee semau Pilisila. Ilou me'a loxo no xalee lia tila ne Itali milai loxo ne Kolinito, xo Kulaudio mutuxu tuala ne Romu mumasaxa lexe ta Iutaia ixolu no tuala tila ne Romu ne uasi. La sou Paulo muxalisi'a ilou ne. 3 bSou ilo'a mixolu mixaxai xo ane'i ilou mi'oxonu xaixai iouvilesisi loxo anu Paulo mu'oxonu nesi sou ilo'a isimesimenu lavalava sou tani alelaxu. 4Xe no Voxo Tavuna utotomu, la anu mulai no taasou lalotu noxi'a ta Iutaia sou ilo'a mivivikala ngatongato'o sou anu mutovonu lexe ulapune'i ta Iutaia ilo'a ta Xiliki sou lexe imuxaxu tane'i no 'a mii ma'ia ane anu ulelemolu.5 cXe no mine Sailasi ilou Timoti me'a ne Makedonia milu'e, la Paulo ne muxaxai pekia'u utotomu sou mua'alo a'alo ulai noxi'a ta Iutaia lexe umaxa'u Iesu ne Anu itema sou pamauli. 6 dIa ta Iutaia ne mimasaxa sou ilomu noxou Paulo uasi, la mivikala masua noxou, la sou anu muvutasou tokolomoxu, io muvikala mulai noxi'a aloxo 'o, “Lexe ngingi ngaxexee noxou Lataua, la anu susu noxinge la. Io eni e'oxonu xaixai noxilosinge mukalu. Ia vaimomo 'o sou eni alai noxi'a ta mitema ane'i ane ta Iutaia uasi.” 7La sou Paulo mulutu lai ne, la mulai no tani noxou itema vile ualasou lexe Taitusi Iusutosi anu itema sou ulotu noxou Lataua. Mo taasou ne mutulu 'alai no taasou lalotu noxi'a ta Iutaia. 8La Kilisuposi e itema sou usaxila'u taasou lalotu noxi'a ta Iutaia mo ta mitema mukalusi ane'i mixolu no tani noxou ne mimuxaxu tane'i noxou Tila. Mo ta mitema ta piena ne Kolinito ne milomusou, la mimuxaxu tane'i mo mi'ulo.
9No anu 'olovoxo vile, la Tila muvikalanu Paulo no anu mii loxo aipiepiena 'o lexe, “Na'ume mamu, ia navikala ulalaisi 'o, mo natalo uasi. 10 eXo Eni axolu noxine. Mo evile sou u'oto noxine mo u'oxo masua noxine uasi. Tava'u lexe ta mitema noxilo ta piena ane'i ixolu no nano no tuala tila ne.” 11Aloxo ne, la sou Paulo muxolu lai ne tauu ie vile mo pa'usou. Sou mulosi'a ta mitema lavulavu no 'a vaikala noxou Lataua.
12Xe no mine Xalio muxolu loxo itema sou usaxila'u xalee lia tila ne Akaia, la ta Iutaia miavuti mipita sou mi'oxo masua noxou Paulo mo milaixu sou mitulusou no anu vaivaikala. 13La ane'i mia'alo aloxo 'o, “Itema ane 'o ne, anu mulapunu xavutalaia'a ta mitema sou ilotu noxou Lataua io no 'a ane umulinu lapuloto uasi.” 14Xe lexe Paulo sou ukolinu vaikala noxi'a la ua, Xalio muavuti la muvikalane'i ta Iutaia aloxo ne, “Lexe ngingi ta Iutaia 'o, ngakalapu sou 'ilixo masua mo nga'alasou lapuloto, la eni alomungenge. 15Ia mii ano 'o ne sou talitali sou vaivaikala mo ualauala mo lapuloto noxinge la sou ngingi menge ngalai mo ngamomosou. Xo eni amasaxa sou avelunu vaivaikala sou mii ane 'o uasi.” 16La sou anu mukusai'a mixexee no anu tanixu vaivaikala. 17Mu'oxone'i aloxo ne, la sou ane'i mitetelisou Sositenesi e itema sou usaxila'u taasou lalotu noxi'a ta Iutaia ne, la mivau 'alai no anu aitengaxu taasou tani e itulusi'a ta mitema no anu vaivaikala no anu. Ia Xalio ne umaxa'u lexe anu tanu u'oxonu mii ane ne sevile uasi.
Pilisila Ilou Akuila
18 fPaulo muxolusi o ne Kolinito ne voxo ta piena mukalu, la anu Mu'italone'i ta mitema ane'i ane mimuxaxu tane'i noxou Iesu, io mutelo no lasipi sou mulai ne Silia. La Pilisila ilou Akuila mitelo sou ilo'a milai. No mine anu utelo no lasipi uao, muxolu ne Kenkulia si 'o, la anu muxotosou laxusou xo tava'u lexe anu musakii vaikala vile mulai noxou Lataua. 19Xe ane'i mixali ne Epeso, la Paulo mu'italone'i Pilisila ilou Akuila lai ne, io anusisi mulai mu'una no taasou lalotu noxi'a ta Iutaia sou ilo'a mixolu mivikalasou. 20Xe ane'i mitali'isou lexe ilo'a ixolu maxuveeni si 'o, la anu umasaxa uasi. 21Ia no mine sou anu mulutu, la anu muvikala aloxo 'o “Lexe Lataua umasaxa, la eni alivu ane'e noxinge la.” Muvikala aloxo ne mukalu, la mu'italone'i mo muionei io mutelo no lasipi ne Epeso sou mulai. 22No mine anu muxali ne Kaisalia, la mutelo ne Ielusalemu sou mu'osasi'a ta mitema ilotu noxou Iesu. Mukalu la mulai mulu'e ne Antioki.Paulo Mumuamua'i sou Xaixai Tatalusou
23Paulo muxolu lai ne Antioki ne voxo mose'i xe ili'i la anu muavuti mulutu lai ne sou mumuamua'i no tuatuala mukalusi no xalee lia tila ne Xalatia xe Pilixia sou mu'oxo pekia'a ta molomolo noxou Iesu.24Ia itema Iutaia vile ualasou lexe Apolosi nenu mivo'onu ne Alekisandolia ne mune'e ne Epeso. Anu ne itema sou vaivaikala laixe mo lavulavu tatila no anu Lavuku Tavuna. 25Anu ne muno'u lavulavu no anu vote'i noxou Tila, mo umasaxa uxali pekia'u no nano no opoonu, sou mua'alo mo mulosi'a lavulavu sou Iesu muisalili. Ia anu mulavusou 'ulo'ulo ane noxou Ioanesi sou 'ulosi'a ta mitema 'o si. 26Anu muavuti musoko sou mua'alo pekia'u io u'ume uasi no nano no taasou lalotu noxi'a ta Iutaia. Xe Pilisila ilou Akuila milomusou, la ane'i mi'avalou mulai no tani noxi'a sou mia'alo noxou lamana laixe no anu vote'i noxou Lataua. 27No mine anu Apolosi mumasaxa lexe ulai ne Akaia, la ta mitema ane'i ane mimuxaxu tane'i noxou Iesu mipatetelinu Apolosi no anu vaivaikala se'i mo mikaukavu mulai noxi'a ta molomolou Iesu lai ne Akaia sou lexe ilooxu mo ino'u. Xe Apolosi muxali la musu'uli tatila mulai noxi'a ane'i ane no anu alauna noxou Lataua la ane'i mimuxaxu tane'i. 28 gXe anu mutulu no anu Lavuku Tavuna lexe Iesu ne Anu Kalisito. La sou anu mu'otoxu vaikala pekia'u mulai noxi'a ta Iutaia no ie'i ta mitema ta piena mo anu mulu'elailixu xavutala masua noxi'a ne.
Copyright information for
ATA